Мы ўсё яшчэ не прыйшлі да высновы, што тое, што расейцы робяць ва Ўкраіне і з украінцамі, зьяўляецца генацыдам, — пракамэнтаваў Радыё Свабода кіраўнік Незалежнай міжнароднай камісіі ААН па расьсьледаваньні парушэньняў ва Украіне Эрык Мёзэ.
«Мы добра ўсьведамляем занепакоенасьць і абвінавачваньні адносна гэтага злачынства. Такім чынам, мы дасьледуем гэта крок за крокам. На дадзены момант у нас няма дастаткова даступных доказаў, каб адпавядаць прававой кваліфікацыі, прадугледжанай Канвэнцыяй аб генацыдзе. Вы памятаеце, што гэта справа намеру, намеру злачынцаў. Павінна быць «неабходнасьць» зьнішчыць пэўную групу. І такое зьнішчэньне, згодна з Канвэнцыяй, павінна быць фізічным або біялагічным. Гэта жорсткія ўмовы, якія пацьвярджаюцца судовай практыкай», — заявіў кіраўнік Незалежнай міжнароднай камісіі ААН па расьсьледаваньні парушэньняў ва Украіне Эрык Мёзэ.
Тым часам украінскія ўлады неаднаразова абвінавачвалі Расею ў генацыдзе, а у Генпракуратуры Украіны раней заяўлялі, што праводзяць аналіз больш за 100 тысячаў ваенных злачынстваў, учыненых Расеяй супраць Украіны з мэтай «генацыду».
Ілюстрацыя: карціна “Езус грукае ў вокны ААН” мастака Гары Андэрсана 1962 г.
