Прэзыдэнт ЗША Дональд Трамп сказаў, што амэрыканцы ў якасьці паслугі дапамагаюць ачышчаць Армузкі праліў ад мінаў у інтарэсах усіх краінаў сьвету, уключна з Кітаем, Японіяй, Паўднёвай Карэяй, Францыяй і Нямеччынай.
«Неверагодна, але ў іх няма ні сьмеласьці, ні волі, каб выканаць гэтую працу самастойна. Аднак, што вельмі цікава, пустыя нафтавозы з многіх краінаў накіроўваюцца ў ЗША, каб ЗАГРУЗІЦЦА нафтай», — напісаў Трамп.
Таксама ён яшчэ раз паўтарыў, што ЗША выйгралі вайну з Іранам, а не прайгралі.
«Іх флёт зьнішчаны, іх ваенна-паветраныя сілы зьнішчаныя, іх зэнітная артылерыя не існуе, радары не працуюць, іх ракетныя і бесьпілётныя заводы амаль зьнішчаныя разам з самімі ракетамі і бесьпілётнікамі, і, што самае важнае, іх шматгадовыя “лідары” больш не з намі, хвала Алаху!» — напісаў прэзыдэнт ЗША.
Раней газэта The New York Times са спасылкай на амэрыканскіх чыноўнікаў паведамляла, што Іран ня можа цалкам адкрыць Армузкі праліў, бо ня ў стане выявіць і абясшкодзіць усе міны, якія сам жа ўсталяваў у акваторыі.
