У межах угоды паміж Венесуэлай і ЗША Мадура вызваліў 20 палітвязняў-венесуэльцаў і 10 амерыканскіх грамадзянаў, ЗША выпусціла з-за кратаў паплечніка кіраўніка Венесуэлы Алекса Сааба.
Давераную асобу Мадура Алекса Сааба арыштавалі ў 2020 годзе і вінавацілі ў адмываньні грошай для Каракасу. Ён вёў бізнэс з урадам Венесуэлы. Як мяркуецца, ён дапамог сямʼі Мадура і ягоным паплечнікам нажыць сотні мільёнаў даляраў на харчовай дапамозе венесуэльцам, якія галадаюць, і вывесьці гэтыя сродкі за мяжу. У 2020 годзе яго затрымалі ў Каба-Вэрдэ і экстрадавалі ў ЗША. Урад Вэнэсуэлы сьцвярджаў, што ў гэтага чалавека ёсць дыпламатычны статус, і выступаў за яго вызваленьне.
Акрамя таго, венесуэльскі бок экстрадаваў прадпрымальніка Лэнарда Фрэнсіса, замешанага ў буйны карупцыйны скандал у ВМС ЗША (цяпер на радзіме яго будуць судзіць).
Каракас прывітаў вызваленне Сааба, назваўшы гэта “перамогай венесуэльскай дыпламатыі”. Прыбыцьцё прадпрымальніка ў Венесуэлу транслявалася па мясцовым тэлебачаньні.
«Мы забяспечваем выкананьне венесуэльскім рэжымам сваіх абавязацельстваў. Яны абвясьцілі аб дарожнай карце выбараў, узгодненай апазіцыйнымі партыямі, для канкурэнтных прэзідэнцкіх выбараў у 2024 годзе. Гэта пазітыўны і важны крок наперад. А сёньня вызваляюць дваццаць палітвязняў, акрамя пяцярых, вызваленых раней. Мы працягнем уважліва сачыць за гэтым і пры неабходнасьці прымем адпаведныя меры. Мы падтрымліваем дэмакратыю ў Венесуэле і спадзяванні венесуэльскага народа»
— заявіў прэзідэнт ЗША Джо Байдэн.
Угода была праведзеная пры пасярэдніцтве Катару.
