У Расеі ФСБ затрымала мужчыну ў Варонежы за быццам падпал цягавай электрападстанцыі, які адбыўся ў Туле 6 лютага.
Расейская спецслужба сьцвярджае, што ў Тулу грамадзянін Беларусі прыехаў 5 лютага і там жа на месцы зрабіў самаробнае запальнае прыстасаваньне і ажыцьцявіў падпал электрападстанцыі. Па версіі ФСБ, затрыманы беларус рабіў гэта па заданьню украінскіх спецслужбаў, за што павінен быў атрымаць грошы. Затрыманы нібыта выйшаў на кантакт з украінскімі спецслужбамі праз жыхара Харкава Атары Данько па мянушцы Грыша («крымінальным аўтарытэтам» з Украіны, які выказваўся супраць расейскага нападу на Украіну, зьвяртаўся да расейскіх зьняволеных з заклікам не ісьці ваяваць).
Грамадзяніну Беларусі пагражае да 20 гадоў зьняволеньня. Адносна яго распачалі крымінальную справу за «Дыверсію» (ч.1 арт. 281 КК РФ).
