29 кастрычніка – чорны дзень у гісторыі беларускай літаратуры. У ноч на 30-га кастрычніка 1937 года карнікамі НКУС былі зьнішчаны больш за 100 прадстаўнікоў беларускай творчай і навуковай інтэлігенцыі, дзяржапарату, а таксама цэлая група пісьменьнікаў – агулам 22 літаратары.
У гэты дзень беларусы ва ўсім сьвеце кожны год ушаноўваюць памяць нявінна забітых суайчыньнікаў.
Беларускае культурнае таварыства “Хатка” арганізавала сустрэчу “(НЕ)РАССТРАЛЯНЫЯ. ДЫЯЛОГІ” у Гданьску. Ноч паэтаў адбылася ў Аблацкім цэнтры адукацыі і культуры.
Сяргей Будкін, як аўтар ідэі і кіраўнік праекту (НЕ)РАССТРАЛЯНЫЯ, выступіў з прамовай і распавёў пра гісторыю праекта. Ноч расстраляных паэтаў праводзіцца ў Гданьску з 2020 г. Напрыканцы кастрычніка 2020 г. прадстаўнікі дыяспары сабраліся на марскім пірсе, дзе чыталі вершы расстраляных паэтаў.
Удзел у сёлетнім мерапрыемстве таксама ўзялі Наста Кудасава – паэтка, аўтарка серыі новых вершаў, прысьвечаных гадавіне “Чорнай ночы”, Алег Гарбуз – беларускі актор групы “Купалаўцы” і Ягор Забелаў – беларускі акардыяніст.
Алег чытаў вершы Міхася Чарота, Вацлава Ластоўскага, Ізі Харыка і іншых. Пасьля кожнага верша, зачытанага Алегам Гарбузом, гучаў верш аўтарства Насты Кудасавай, які пераклікаўся з папярэднім. Вершы гучалі пад акампанемент акардыёна Ягора Забелава.
