Ля помніка Касьцюшку ў Варшаве прайшла пратэстацыйная акцыя, арганізаваная рухам “Вольная Беларусь”
Галоўнымі тэмамі акцыі сталі фальшывыя “выбары”, палітвязьні і вызваленьне Беларусі з-пад расейскай акупацыі.
З прамовамі выступілі лідар “Вольнай Беларусі” Зянон Пазьняк, сябра Нацыянальнага Сакратарыяту Павел Усаў і іх паплечнікі.
Прысутныя ўшанавалі памяць загінулых ва Украіне беларускіх гэрояў. Асобна ўзгадалі Эдуарда Лобавага, які загінуў роўна 2 гады таму, а перад прысутнымі выступіў яго сябра, актывіст Андрусь Цянюта.
Сярод выступоўцаў — былыя палітвязьні Ірына Шчасная і Віктар Пархімчык. Яны распавялі пра нечалавечныя ўмовы ў калёніях ды “катаваньні вязьняў рускім мірам”.
Галіна Пазьняк у сваёй прамове нагадала пра важнасьць захаваньня сваёй нацыянальнай ідэнтычнасьці, беларускай мовы і культуры. Валеры Буйвал казаў пра тое, што народ масава ігнаруе фальшывыя выбары, а рэжым “падвісае ў паветры” без падтрымкі людзей.
Лідар Руху салідарнасьці “Разам” Вячаслаў Сіўчык нагадаў прысутным пра яшчэ аднаго беларускага гэроя — Міхася Жызьнеўскага, які нарадзіўся менавіта 26 студзеня і аддаў сваё жыцьцё на Майдане падчас украінскай Рэвалюцыі Годнасьці. Асобная ўвага была нададзена таму, што ніводнае СМІ не ўзгадала нашых гэрояў.
