(Тлумачэньне): Гэты расклад ня мае дачыненьняў да так званай “апазыцыі” (“осц” і т.п.) і да так званых “дэмсіл” (канфармісцкіх і шкодных для Беларусі). Ён (у маёй прапанове) выяўляе (у асноўным) пазыцыю беларускіх нацыянальных палітыкаў і пасьлядоўнікаў Нацыянальна-Вызвольнага руху. НВР — гэта не “апазыцыя”. Гэта супраціў.
- Стан, які намеціўся ў сьвеце, — гэта латэнтны стан сусьветнай вайны, гарачы цэнтар якой знаходзіцца на франтах Украіны.
- Для нас, беларусаў, галоўнае пытаньне ў гэтым становішчы — што будзе зь Беларусяй.
- Антыбеларускі рэжым Лукашэнкі знаходзіцца пад шчыльным палітычным уплывам і кантролем з боку Расеі.
- З боку Эўразьвязу, яго ўдзельнікаў і сатэлітаў, ствараецца рэальнасьць варожасьці да Беларусі і, пад выглядам непрыняцьця дыктатарскага рэжыму Лукашэнкі, робіцца ізаляцыя народу і нішчэньне беларускай дзяржавы ўвядзеньнем рознага роду эканамічных санкцый.
- У гэтым становішчы беларускія нацыянальныя СТРАТЭГІЧНЫЯ ІНТАРЭСЫ можна адзначыць наступным чынам:
– параза Расеі ў агрэсіі супраць Украіны;
– ліквідацыя рэжыму Лукашэнкі;
– забесьпячэньне дзяржаўнага нацыянальнага разьвіцьця Беларусі.
– Амэрыканскія інвестыцыі ў беларускую эканоміку.
ТЛУМАЧЭНЬНЕ-1
Створана сітуацыя, калі кантроль над беларускай палітыкай і эканомікай у рознай ступені імкнуцца ажыцьцяўляць дзьве звышдзяржавы — Расея і Кітай. Такое становішча небясьпечнае для незалежнасьці Беларусі і разьвіцьця дэмакратыі.
Для ажыцьцяўленьня раўнавагі, апоры для суверэнітэту і дэмакратыі пажадана, каб у створаным становішчы у беларускай эканоміцы і дэмакратычным разьвіцьці прымылі ўдзел Злучаныя Штаты Амэрыкі (інвестыцыі і інтарэсы ЗША).
- ТАКТЫЧНЫЯ ДЗЕЯНЬНІ
ў сітуацыі існаваньня “рэжыму”:
– павелічэньне палітычнай суб’ектнасьці Беларусі дзеля зьберажэньня дзяржавы;
– недапушчэньня ўдзелу рэжыму Лукашэнкі ў расейска-украінскай вайне;
– ліквідацыя антыбеларускай палітыкі эканамічных санкцый коштам вызваленьня палітвязьняў і спыненьня рэпрэсій.
У рэчышчы вышэй адзначаных дзеяньняў беларускім нацыянальным інтарэсам (павелічэньню суб’ектнасьці) адпавядае правядзеньне ў Менску любых міжнародных кантактаў аб мірным працэсе і пастаноўка пытаньня аб бяз’ядзерным статусе і вывадзе расейскіх войскаў зь Беларусі. Гэтае пытаньне павінна быць унесена ў план перамоваў аб міры паміж Расеяй і Украінай.
Усе гэтыя задачы ўжо рэгулярна прапісаныя і прамоўленыя беларускімі нацыянальнымі палітыкамі. Зрух ужо адбыўся якраз па лініі тактычных дзеяньняў у сітуацыі існаваньня “рэжыму”, прытым па ўсіх накірунках. У тым ліку і ў пэрспэктыве магчымых амэрыканскіх інвестыцый ў здабываючую эканоміку Беларусі.
ТЛУМАЧЭНЬНЕ-2
Усе адзначаныя тактычныя дзеяньні ўзвышаюць палітычны статус Беларусі, але (на жаль) адначасна ўздымаюць ролю ўлады антынароднага рэжыма Лукашэнкі. Тут стандартнае тактычнае дзеяньне ў палітыцы, дзе трэба ведаць, што антыбеларускі рэжым — зьява дачасная (гістарычна кароткая) і мінаючая, а дзяржава і незалежнасьць — зьява працяглая (і агульнанародная). У барацьбе супраць антынацыянальнага рэжыму Лукашэнкі (улічваючы расейскі чыньнік) нельга дапусьціць, каб рэжым угробіў дзяржаву і незалежнасьць. Дзяржава належыць народу, але не ўзурпатару.
У змаганьні з антынародным рэжымам трэба забясьпечваць пэрспэктыву дзяржаве і нацыі, якая існуе аб’ектыўна.
24 лістапад 2025 г.
Зянон ПАЗЬНЯК
