22 лістапада ў невялічкай вёсцы Мастаўляны на польска-беларускім памежжы актыўная беларуская грамада Беластоку пры падтрымцы мясцовай улады гмінаў Міхалова і Гарадок урачыста адкрыла інфармацыйныя шыльды каля месца, дзе калісьці стаяла фамільная сядзіба роду Каліноўскіх. На шыльдах змешчаныя выява сядзібы і кароткая гістарычная даведка пра яе, а таксама пра кіраўніка паўстання на Літве Вінцэнта-Канстантына (Кастуся) Каліноўскага, які нарадзіўся ў гэтай сядзібе.
Удзельнікі імпрэзы разам з ганаровай вартай, арганізаванай сябрамі рэканструктарскага клюбу “Invictus 1863”, прайшлі ад помніка паўстанцам у Мастаўлянах да ўсталяваных інфармацыйных шыльдаў.
Сам аўтар і выканаўца інфармацыйных табліцаў Януш Талуць разам з кіраўніцай Аргкамітэту па мемарыялізацыі сядзібна-паркавага ансамбля Каліноўскіх у Мастаўлянах Вольгай Сямашка здымалі покрывы з новага помнага знаку.
Ксёндз Вячаслаў Барок асьвяціў шыльды, а ў сваёй прамове выказаў думку, што Кастусь Каліноўскі ня быў пачаткам беларускай нацыі і не зьяўляецца канцом працэсу яе сьцверджаньня. Без папярэдніх пакаленьняў патрыётаў Бацькаўшчыны, сам Кастусь ня змог бы з’явіцца ў гэты сьвет, а сёняшняя дзяржава Беларусь таксама бы не існавала бяз вычыну Каліноўскага. Сьвятар нагадаў, што здаровы нацыяналізм – гэта бязьмежная любоў да свайго, а не нянавісьць да іншага. І такі нацыяналізм жыцьцёва неабходны сёньня беларусам як на Радзіме, так і за яе межамі, бо бойка за свабоду Беларусі ўсё яшчэ трывае.
Іншыя ўдзельнікі ўрачыстасьці ўзгадвалі таксама падзеі шасьцігадовай даўніны – пахаваньне адшуканых парэшткаў паўстанцаў на віленскіх могілках Росы, дзе знаходзіцца таксама сэрца Юзафа Пілсудзкага. Сымбалізм і духоўная сувязь адчуваюцца на кожным кроку, дастаткова толькі расплюшчыць вочы.
Для некаторых з удзельнікаў урачыстага адкрыцьця табліцаў нацыянальна-вызвольная вайна працягваецца і сёньня ня толькі ў словах, але ў канкрэтным гераічным дзеяньні. Колішні ваяр Палка Каліноўскага падчас імпрэзы зьвярнуўся да мясцовых уладаў з просьбай усталяваць у Мастаўлянах помнік, куды б маглі прыходзіць сваякі і пабрацімы загінулых ва Ўкраіне беларусаў, бо на Радзіме, на жаль, нават існыя помнікі паўстаньню 1863 зьнішчаюцца, а сем’і ваяроў ПКК перасьледуюцца і ня маюць магчымасьці аплакваць сваіх загінулых родных.
Сярод запрошаных на ўрачыстасьць гасьцей прысутнічалі і бралі слова таксама намесьнік бурмістра гміны Міхалова Эльжбэта Росіньска, дырэктар цэнтра культуры ў Гарадку Магдалена Лотыш, прафэсар Лявон Тарасевіч, палітык Павал Латушка, прадстаўнік цэнтру беларускай культуры ў Беластоку, прадстаўнік беларускай дыяспары Беластока Ян Абадоўскі і прадстаўнік клюбу “Invictus 1863” Васіль Калач. Вольга Сямашка зачытала ліст Уладзімера Арлова.
