Расейскія войскі былі вымушаныя пакінуць больш за 200 км² на галоўным кірунку наступу ў Данецкай вобласьці і страцілі плацдарм на поўнач ад Ліману.
Паводле OSINT-аналітыка Клемана Молена, а таксама Rochan Consulting і ISW, пасьля чатырохмесячнага контрнаступу Ўкраіна вызваліла шэраг населеных пунктаў і фактычна адрэзала частку расейскай групоўкі.
Кіраўнік Rochan Consulting Конрад Музыка ацэньвае страты тэрыторыі Расеі ў 240 км² і лічыць, што плян акружэньня Славянска-Краматорскай аглямэрацыі з поўначы праваліўся. ISW адзначае, што ў выніку ўкраінскай апэрацыі расейскія тэрытарыяльныя заваёвы з пачатку сакавіка былі фактычна абнуленыя.
Праблемы пад Ліманам прызнаюць і расейскія ваенблогеры. Канал «Рыбарь» зьвязвае іх з «сыстэмнай хлусьнёй у дакладах наверх» і няправільнай ацэнкай сытуацыі.
Раней The New York Times паведамляла, што Пуцін паставіў перад войскам задачу захапіць Данбас да восені 2027 году.
