Беларускі рэжысёр Андрэй Кудзіненка быў вымушаны ўцячы з краіны пасьля ператрусаў КДБ і АМАПу. Раніцай 22 ліпеня сілавікі прыйшлі ў ягоную кватэру, а затым правялі ператрус у прыватнай кінашколе «КінаКалайдар», якой ён кіраваў. Цяпер рэжысёр знаходзіцца ў бясьпецы за межамі Беларусі.
Сілавікі шукалі «экстрэмісцкія» матэрыялы, распытвалі пра замежнае фінансаваньне і нават пра спробу школы атрымаць падтрымку ЮНЭСКА. Паводле Кудзіненкі, нічога забароненага не знайшлі, але школу фактычна закрылі: праводзіць заняткі забаранілі, а самому рэжысёру пагражалі 8–12 гадамі зьняволеньня.
Асобнае падазрэньне КДБ выклікала тое, што школа называла сябе незалежнай. «Для іх усё незалежнае адразу азначае дрэннае і экстрэмісцкае», — кажа Кудзіненка.
Паводле яго, пад ціскам апынуліся і іншыя недзяржаўныя кінашколы: частка закрылася, перайшла ў онлайн або адмяніла праграмы. «КінаКалайдар», паводле рэжысёра, заставаўся адным з апошніх.
«Займацца проста мастацтвам ужо нельга без дазволу. На ўсё трэба мець дазвол і вока назіральніка», — падсумоўвае Кудзіненка.
Крыніца: Белсат
