У Смаленску 35-гадовага Дзьмітрыя Тузава аштрафавалі за камэнтары, у якіх ён пісаў пра неабходнасьць вызваленьня Смаленску, выхаду гораду са складу Расеі і наступнага далучэньня да Беларусі.
Расейскія сілавікі знайшлі тры ягоныя камэнтары ва «ЎКантакце». У адным Тузаў станоўча ацэньваў магчымасьць выхаду Смаленску з Расеі і далучэньня да Беларусі, у іншым пісаў пра вызваленьне гораду.
Ленінскі раённы суд Смаленску прызнаў яго вінаватым у «публічных закліках да парушэньня тэрытарыяльнай цэласнасьці Расеі» і прызначыў мінімальны штраф — каля $775.
За тыя ж публікацыі супраць Тузава распачалі і крымінальную справу — аб «публічных закліках да тэрарыстычнай дзейнасьці».
Паказальна, наколькі жорстка расейская дзяржава рэагуе нават на абмеркаваньне іншага палітычнага статусу Смаленску. За развагі пра беларускае будучае гораду чалавек апынуўся пад судом і стаў фігурантам крымінальнай справы.
