Расейскі рынак бензіну працягвае перапісваць цэнавыя максімумы на фоне нарастаючага дэфіцыту паліва, які ахапіў паўднёвыя рэгіёны.
У панядзелак, 4 верасня, на Санкт-Пецярбургскай міжнароднай таварна-сыравіннай біржы кошт бензіну “Прэміум-95” упершыню ў гісторыі пераваліў за адзнаку 75 тысяч рублёў за тону – паведамляе выданьне The Moscow Times.
Бензін АІ-95 падаражэў на 21% з пачатку лета і на 74% з пачатку года, тым самым устанаўліваў рэкорд 10 гандлёвых дзён запар. Рост коштаў на «Рэгуляр-92» склаў 21% і 76% адпаведна, а каціроўкі дасягалі 64814 рублёў за тону. Летняе дызельнае паліва ў панядзелак прадавалі на біржы па 68 278 рублёў за тону – на 58% даражэй, чым у пачатку года.
Настолькі рэзкага росту біржавы рынак бензіну ў Расеі не бачыў ні разу як мінімум за апошнія сем гадоў.
“Кошты шаленыя”, – сказаў Reuters уладальнік адной з нафтабаз.
