Як піша канал Спадчына, мясцовыя ўлады анансавалі знос гістарычнага драўлянага дома па вуліцы Савецкай, 49 — апошняга ацалелага будынка з ансамбля, які мясцовыя ўлады паслядоўна зьнішчаюць апошнія гады.
Падчас прамой тэлефоннай лініі старшыня Мінскага райвыканкама Дзяніс Колесень пацвердзіў намер зраўняць пабудову з зямлёй яшчэ сёлета. На «благі выгляд» дома пажалілася мясцовая жыхарка, якая адзначыла, што падчас падрыхтоўкі да абласных «Дажынак» мінулага года два суседнія «баракі» прыбралі, а гэты пакінулі. Чыноўнік супакоіў заяўніцу, паабяцаўшы знос адразу пасля ўрэгулявання «юрыдычных нюансаў».
Гэты дом з’яўляецца часткай аўтэнтычнай драўлянай забудовы цэнтра горада, якая метадычна ліквідуецца дзеля «прыгажосці». Нагадаем, што ў 2025 годзе на гэтай жа вуліцы былі знесеныя колішняя крама 1912–1914 гадоў (дом №34), гістарычная карчма (№36) і драўляны дом 1927 года (№45). Усе гэтыя аб’екты яшчэ дзесяць гадоў таму афіцыйна з’яўляліся гісторыка-культурнымі каштоўнасцямі: былі ўзятыя пад ахову ў 1994-м і ўнесеныя ў Дзяржаўны спіс у 2007-м.
Пазбаўленьне гэтых будынкаў ахоўнага статусу адбылося ў 2014 годзе пры падрыхтоўцы да Дня беларускага пісьменства. Гэта рашэньне было фактычна незаконным, паколькі Кодэкс аб культуры не дазваляе выключаць аб’екты са спісу прыкладна ні ў якіх сітуацыях.
Крыніца: pristalica.by
