Каманда Stembridge, якая апынулася ў Літве пасьля перасьледу ў Беларусі, займаецца арганізацыяй беларускамоўнай групы дзяцей у дзіцячым садку. Групу адкрыюць, калі набярэцца мінімум 15 дзетак. Зараз прымаюць заяўкі на малых ад 2 да 6 гадоў да канца чэрвеня.
«Мы хочам стварыць бясьпечную, сучасную і стымулюючую адукацыйную прастору ў Вільні, дзе маленькія беларускія дзеткі змогуць захоўваць сваю ідэнтычнасьць і родную мову, адначасова атрымліваючы найлепшую інтэграцыю ў літоўскае грамадзтва праз білінгвальную мадэль навучаньня. Мы, беларускія пэдагогі і каманда Stembridge, а таксама бацькі, якія апынуліся ў Літве, — усе мы аднойчы сутыкнуліся з адным і тым жа пытаньнем: як зрабіць так, каб дзіця не страціла сябе ў новым асяродзьдзі?
Адказ, які мы знайшлі — не хавацца ад рэчаіснасьці і не растварацца ў ёй. А ствараць прастору, дзе беларускае і літоўскае існуюць побач натуральна. Размаўляючы па-літоўску, вы ня станеце літоўцам — як не станеце брытанцам, размаўляючы па-ангельску. Мы падтрымліваем свае карані і ўнікальнасьць у шматнацыянальным сьвеце», — гаворыцца ў звароце.
У садку дзеткі-беларусы будуць засвойваць адразу тры мовы — беларускую, літоўскую і ангельскую.
Беларуская — галоўная мова камунікацыі, гульняў, эмоцыяў і творчасьці. Гэта ня толькі народныя казкі, але і мова, на якой абмяркоўваюць робататэхніку, глядзяць мультфільмы, слухаюць сучасную музыку і сустракаюцца з цікавымі людзьмі.
Літоўская мова ўводзіцца паступова праз гульні і зносіны з дзеткамі з партнэрскага садка Gervuogė («Ажыны») і інтэграцыю ў культурнае жыцьцё Вільні.
Ангельская мова будзе прысутнічаць у бытавых зносінах. Актыўныя заняткі пачынаюцца ў групе Preschool.
Таксама каманда абяцае актыўную працу з бацькамі — камусьці гэта можа дапамагчы нават з інтэграцыяй у літоўскае грамадзтва.
Групу адкрыюць, калі набярэцца мінімум 15 дзетак. Цяпер прымаюць заяўкі на малых ад 2 да 6 гадоў. Група можа быць аднаго ўзросту або зьмешаная — усё залежыць ад заявак. Збор заявак працягнецца да канца чэрвеня.
Усе ліцэнзіі і дазволы на адукацыю ўжо ёсьць, усё паводле закону і з гарантыяй бясьпекі і якасьці, кажуць у садку. Новы корпус на Грунвальдзкай (Žalgirio g.), 135 зроблены спэцыяльна для дзетак: сьвятло нармальнае, вэнтыляцыя працуе, усё эрганамічна, матэрыялы бясьпечныя.
Старонка ініцыятывы, дзе можна падаць заяўку: https://stembridge.lt/kids/bel
