“Белавія” папярэджвае, што зь 20.00 1 верасьня адключыць сістэму электроннага браніраваньня авіябілетаў. Часова будуць недасяжныя паслугі браніраваньня, пакупкі, абмену, вяртаньня авіябілетаў і г. д. Гэтыя апэрацыі нельга будзе правесьці ні на сайце, ні ў дадатку, ні ў офісах авіякампаніі.
Прычына – правядзеньне тэхнічных работ па пераходзе авіякампаніі на расейскую сістэму браніраваньня авіябілетаў “Леанарда”. Работу сэрвісаў плануецца аднавіць 2 верасьня.
Сістэма браніраваньня білетаў «Леанарда» была распрацаваная ў Расеі ў 2022 годзе для замены замежных (эўрапейскіх і амэрыканскіх) аналагаў, якімі карысталіся мясцовыя перавозчыкі.
Нагадаем, што беларуская авіякампанія “Белавія” знаходзіцца пад санкцыямі пасьля прымусовай пасадкі самалёта і затрыманьня Пратасевіча. А ў трэцяю гадавіну пратэстаў 2020 у Беларусі, 9 жніўня, ЗША ўзмацніла санкцыі супраць “Белавія”.
Выглядае, што для кампаніі “Белавія” пераход у расейскую сістэму “Леанарда” стаў адзіным выйсьцем ва ўмовах блакаваньня санкцыямі.
