У сталіцы Украіны, Кіеве, у аўторак адбылося развітаньне з грамадзянінам Польшчы беларускага паходжаньня Пшэмыславам Расевічам-Кучынскім, былым жаўнерам Палка імя Кастуся Каліноўскага – паведамляе “Радыё Рацыя”.
На развітаньні прысутнічала сям’я загінулага з Польшчы, а таксама прадстаўнікі польскай дыпламатыі ва Украіне. Цэрымонія праходзіла пры ўдзеле вайсковай ганаровай варты Узброеных сіл Украіны на Байкавых могілках.
На труне з целам ваяра ляжалі тры сьцягі: беларускі, польскі і ўкраінскі. На заканчэньне прагучалі гімны Украіны і Польшчы і беларуская патрыятычная песьня «Пагоня».
Пшэмыслаo Расевіч-Кучынскі прыехаў ва Украіну з Польшчы бараніць Украіну ад расейскай агрэсіі.
Пшэмыслаў пачаў службу ва Ўкраіне ў беларускім добраахвотніцкім палку Каліноўскага, куды запісаўся па ўласным жаданьні, бо меў беларускія карані.
Пасля звальненьня з палка пайшоў добраахвотнікам, дапамагаў Узброеным сілам Украіны, неўзабаве ўступіў у шэрагі УС Украіны.
