Пра незаконнасьць помніка Кастусю Каліноўскага і яго паплечнікам ля Францішканскага касцёлу ў Вільні заявіла старшыня Камісіі гістарычнай памяці сталічнага гарсавета Каміле Шэрайтэ-Гагелене – Delfi.lt.
Каміле Шэрайтэ-Гагелене распавяла, што камісія, якую яна ўзначальвае, летась не ўхваліла ўстаноўку помніка, а кіраўніцства кляштару было праінфармавана аб такім рашэньні віленскай мэрыі у пісьмовай форме.
“Камісія па гістарычнай памяці разглядала гэтае пытаньне ў жніўні і, як і належыць, здаецца, цягам 10 працоўных дзён заяўнікі былі пастаўленыя ў вядомасьць, што Камісія па гістарычнай памяці не дала згоды на ўстаноўку помніка”.
Такім чынам, падкрэслівае старшыня камісіі, помнік устаноўлены нелегальна.
Як сказала чыноўніца Віленскай мэрыі, праект «павінен быў быць ухвалены не толькі з боку муніцыпалітэта, але і Дэпартаментам культурнай спадчыны, бо месца ўстаноўкі — тэрыторыя старога горада і грамадская прастора».
Рашэньне аб далейшых дзеяньнях павінен прыняць Дэпартамент культурнай спадчыны.
“Тут ёсць варыянты — можа быць прызначаны штраф або дадзены час на афармленьне ўсіх гэтых дазволаў, ці нават дэмантаж помніка. Але тут ужо ДКС будзе вырашаць, якім можа быць пакараньне”.
Нагадаем, помнік Кастусю Каліноўскаму быў адкрыты ў пятніцу, 22 сакавіка. Месца для ўсталяваньня помніка (тэрыторыя Францішканскага кляштара) было выбрана зусім не выпадкова — у 1961 годзе там адбыліся першыя рэлігійна-патрыятычныя антырасейскія маніфестацыі.
На адкрыцьці манумэнта прысутнічалі каталіцкія іерархі Вільні, афіцыйныя асобы з Сейма Летувы, ураду Летувы, прадстаўнікі НАТО, дыпламаты, афіцыйныя асобы з польскага боку, чальцы польскіх і літоўскіх маладзёвых каталіцкіх арганізацый, беларускія актывісты.
