Згодна з дасье ізраільскай разьведкі, якое ёсьць у распараджэньні Reuters, 190 супрацоўнікаў Блізкаўсходняга агенцтва ААН для дапамогі палестынскім бежанцам і арганізацыі работ (БАПОР) бралі ўдзел у нападзе тэрарыстаў ХАМАС на тэрыторыю Ізраіля.
11 чалавек са сьпісу працавалі настаўнікамі і ў той жа час былі баевікамі ХАМАС і групоўкі “Ісламскі джыхад”. У дакладзе зьмяшчаюцца іх імёны і фатаграфіі.
У прыватнасьці, у дасье апісваецца, як адзін супрацоўнік БАПОР, які апроч гэтага працаваў у школе, дапамагаў свайму сыну ў выкраданьні жанчыны падчас налёту баевікоў на тэрыторыю Ізраіля. Іншы чалавек, сацыяльны работнік, абвінавачваецца ў перавозцы ў Газу цела ізраільскага афіцэра і каардынацыі руху транспартных сродкаў тэрарыстаў і размеркаваньні зброі. Яшчэ адзін, паводле дасье, быў заўважаны ў разні ў кібуцы Беэры, у якім тэрарысты забілі кожнага дзясятага жыхара. Чацьвёрты абвінавачваецца ва ўдзеле ў нападзе на музычны фестываль у Рэіме, дзе былі забітыя больш за 360 чалавек.
У Палестынскай аўтаноміі абвінавацілі Ізраіль у фальсіфікацыі інфармацыі з мэтай ачарніць рэпутацыю БАПОР. У самой арганізацыі раней заяўлялі, што некаторыя з супрацоўнікаў былі звольненыя, а ў адносінах да іншых праводзіцца праверка.
Больш за 10 краін, у тым ліку ЗША і Германія, заявілі аб спыненні фінансаваньня БАПОР. ААН пачала расследаваньне здарэньня.
Па словах кіраўніка агенцтва Філіпе Лаццарыні, інфармацыя аб датычнасці супрацоўнікаў БАПОР да нападу на тэрыторыю Ізраіля, які адбыўся 7 кастрычніка мінулага года, была прадстаўлена ізраільскім бокам. Па словах прэс-сакратара Генеральнага сакратара ААН Стэфана Дзюжаррыка, Антоніу Гутэрыш азнаёміўся з матэрыяламі і «прыйшоў у жах ад убачанага».
Блізкаўсходняе агенцтва ААН для дапамогі палестынскім бежанцам заснавана ў 1949г. Яно дапамагае палестынскім бежанцам, аказвае гуманітарную дапамогу, дае сацыяльныя паслугі.
