7 студзеня ў касьцёле сьвятога Аляксандра ў Варшаве адбылася прэм’ера каляднага спэктаклю «Зорка да Бэтлеему» ад тэатру “Купалінка”.
Рэжысерка спэктаклю – Натальля Локіць, аўтар – Сяргей Кавалёў.
Героі спэктаклю “Зорка да Бэтлеему” – гэта вобразы-сымбалі, кожная роля і рэпліка складаецца ў адзіную карціну, што паказвае беларускае грамадства. Талент твору заключаецца ў тым, што гледач здагадваецца, праэцыруе вобразы Осліка, яго Гаспадра, Парсюка, Льва, Малпы, Жаўнераў (адмоўныя героі, адзіныя, хто размаўляе на расейскай у п’есе), Зорак на рэальных персаналій сучаснасьці. Найбольш яскрава героі раскрываюць сябе ў сваім стаўленьні да пошуку Бога.
У цэнтры твору – Язэп, Марыя і іх дзіцятка, Бог. Ролю Марыі выдатна сыграла Юстына Карпіловіч. Адным з самых кранальных момантаў спэктаклю была калыханка малому Езусу. Гледачы былі зачараваныя голасам Юстыны, дарэчы, яна жа і напісала словы да калыханкі.
Юстына Карпіловіч у ролі Дзевы Марыі. Здымак узяты з фэйсбук-каналу “Купалінка”
Прэм’ера адзначылася аншлягам. Па завяршэньню дзеі публікала дзякавала артыстам бурнымі апладысментамі.
Сярод гледачоў былі: аўтар п’есы Сяргей Кавалеў, ксёндз Вячаслаў Барок і палітык Зянон Пазьняк. Напрыканцы спэктаклю ганаровыя госьці далучыліся на сцэне да артыстаў, зьвярнуліся да ўдзельнікаў тэатру і гледачоў словамі падзякі і пажаданьняў.
Зянон Станіслававіч, вядомы не толькі як палітык, але як пісьменьнік і знаўца тэатру, адзначыў выдатную гульню актораў, пастаноўку, рэжысерскую працу, вакал і спевы спэктаклю.
Тэатральная студыя “Купалінка” дзейнічае з 2020 года для мігрантаў ў Варшаве, гэта першы тэатр для мігрантаў у Варшаве. Артысты тэатру – пераважна беларускія дзеці і падлеткі, але таксама ўдзельнічаюць дарослыя, далучаюцца да трупы і дзеці з Украіны.
