19-20 лістапада ва ўкраінскім горадзе Луцку прайшоў «Форум беларускага культурнага супраціву», адным з арганізатараў якога выступiў полк імя Кастуся Каліноўскага. У межах форуму была прэзентавана ўнiформа будучай армii Беларусі.
На сваім вэб-сайце ваяры паведамілі, што над ініцыятывай ужо працяглы час працуе Геральдычная рада “Пагоня“. Разам з прадстаўнікамі палка Каліноўскага і іншых узброеных структур беларусаў ва Украіне рада займаецца распрацоўкай і абмеркаваньнем вайсковых знакаў адрозненьня, унiформы, узнагародаў і іншых вайсковых пытаньняў.
Галоўнае пытаньне якое стаіць перад Радай і ваярамі: Якой будзе армія ў вольнай Беларусі?
Гэта і пра якасны чыньнік і пра зьнешні выгляд жаўнераў. Чырвона-зялёны лукашэнкаўскі мундзір — сімвал змрочнай адыходзячай эпохі. Колеры знакаў і шэўронаў войска Вольнай Беларусі – белы і чырвоны.
У далейшым плануецца стварэнне вайсковай камісіі з больш шырокiмi функцыямi і наданне беларусам, якія ваююць ва Украіне, беларускіх вайсковых званьняў.
“Пасля звяржэньня рэжыму Лукашэнкi, беларускія патрыёты з вайсковым досьведам павінны заняць у новым беларускім войску пасады, якія адпавядаюць іх ведам і званьням”
– дэкларуюць Каліноўцы.
