10 лістапада беларускі музычны гурт ATESTA прэзэнтаваў на канале Ютуб свой новы кліп “Дзьмухаўцы” .
Пра што гэта песьня?
Адказвае вакалістка гурта Ульяна Паўловіч:
З 2020г і да гэтага часу шмат людзей было вымушана зьехаць з роднай краіны ў невядомасьць у пошуках бясьпекі. У новых абставінах апынуліся людзі рознага веку, якім выпала прыстасоўвацца да новых умоваў жыцьця. Сярод іх моладзь і падлеткі. 16, 17, 18 год – дзеці, што лепш бы безклапотна віраваліся ў студэнцкім жыцьці, засталіся сам-насам з дарослым жыцьцем і праблемамі.
Аўтарка песьні, Ульяна Паўловіч, апынулася ў эміграцыі ў 17 год.
Песьня “Дзьмухаўцы” – гэта не проста рэфлексія, гэта вельмі асабістая гістарыя пра тое, як раптам губляеш усё: адчуваньне абароненасьці, бо побач былі матуля, дом, былі бабулі з дзядулямі, да якіх так любілі езьдзіць на лецішча, сябры, знаемыя вуліцы роднага горада, а зараз нічога няма. Есьць чужы горад і адзінота. Маштаб гэтага болю нагадвае айсберг, ўсё гэта пражываецца ўнутры, сам-насам з сабою, бо зусім не хочацца хваляваць сваіх родных. Гэта ціхі, нікому не бачны і нікому не патрэбны боль.
Амаль у кожнага юнака галоўная мара – вярнуцца на Радзіму, прайціся па родным вуліцам, абняць бабулю ды дзядулю, вярнуцца дадому. Гэта ўсё пра нашу моладзь з чулымі сэрцамі і душой, якая прымае новыя ўмовы і імкнецца захаваць сябе.
Гурт ATESTA быў заснаваны ў Менску ў 2018, зараз асноўны склад гурта знаходзіцца ў Польшчы і шмат выступае, як у электрычнасці, так і ў акустыцы.
