16 верасьня ў Варшаве адбылося афіцыйные адкрыцьцё спартыўнага клубу “Волат”. Урачыстая імпрэза распачалася з прамовы заснавальніка клуба Віталя Рака. Заснавальнік і трэнер клубу “Волат” акрэсліў галоўныя мэты і планы клубу:
“Зараз наша нацыя стаіць перад выклікам, і я лічу што гэта добра, таму што выклік – гэта магчымасьць стаць мацней. Мы мусім стаць мацней, мы мусім выжыць, і клуб “Волат” – гэта інструмэнт барацьбы. Гэта інструмэнт падрыхтоўкі беларусаў: фізічнай, маральнай, сацыяльнай, матывацыйнай”
Па словах Віталя Рака, патэнцыял будынку пад клуб зараз выкарыстоўваецца толькі прыкладна на 25 адсоткаў, маецца ячшэ многа плошчы, памяшканьняў, якія будуць пераробленыя ў далейшым для трэніровак клубу. Заснавальнікі клубу бачаць сваю дзейнасьць як працу на карысьць беларускаму народу. “Клуб мае стаць годным элемэнтам у механізме вызваленьня Радзімы і развіцьці нацыі” – запэўніў Віталь Рак.
Наступным слова ўзяў выканаўчы дырэктар Фонду Спартыўнай Салідарнасьці Аляксандар Апейкін. Ён павіншаваў беларусаў з адкрыцьцём клуба і адзначыў важнасьць гэтай падзеі для развіцьця беларусаў. Фонд Спартыўнай Салідарнасьці зьяўляецца адным з партнэраў клубу і ўжо актыўна яму дапамагае.
“Гэта важна для новага пакаленьня беларусаў, для беларусаў, якія, нажаль, выехалі. але хочуць, каб дзеці ўсе ж такі раслі у беларускай культуры, у беларускіх традыцыях”
Пасьля выступаў з прамовамі, музыка гурту “Ізалятар” выканаў на дудзе гімн “Багародзіца” – песьню-малітву, якую выконвалі ваяры пад час бітваў і грамада выйшла вонкі на урачыстае ўзняцьце нацыянальных сцягоў Беларусі, Польшчы і Украіны над будынкам клуба.
Далей госьці былі запрошаныя ў спартыўную залю, дзе распачалася канцэртная частка. Госьці клубу паслухалі музычныя творы на дудзе і бубне ад гурта “Ізалятар”, а затым выступ Піта Паўлава.
Словы легендарнай песьні “Тры чарапахі”, якую супольна выконвалі Піт Паўлаў і музыкі “Ізалятара”, падхапіла ўся заля. Апошнім спевам Піта Паўлава быў духоўны гімн Беларусі “Магутны Божа”. Спявалі разам усё госьці.
Напрыканцы іпрэзы адбыўся розыгрыш абанемэнтаў у клуб “Волат”. У спартыўных спаборніцтвах за прызы удзельнічалі як дзеці, так і дарослыя.
Спартыўны клуб “Волат” знаходзіцца ў Варшаве па адрэсе Artura Malawskiego,6.
Відэа рэпартаж мерапрыемства:
