Жыхар Жлобіна Мікалай Молаткоў падчас адпачынку ў Слаўгарадзкім раёне Магілёўскай вобласьці знайшоў у рацэ Проня, недалёка ад вёскі Бярозаўка, амаль цэлы гліняны гаршчок.
Ён перадаў знаходку ў Інстытут гісторыі НАН Беларусі. У канцы жніўня археолягі абсьледавалі месца знаходкі.
Навукоўцы высьветлілі, што гаршчок знаходзіўся ў яме на глыбіні да 3 мэтраў, заваленай бярвеньнем.
Навуковы супрацоўнік Інстытуту гісторыі Алесь Вараненка паведаміў, што гэта ўнікальны артэфакт канца нэаліту — пачатку бронзавага веку, якому можа быць не менш за 5000 гадоў.
Паводле археоляга, такія знаходкі ў Беларусі адзінкавыя: падчас раскопак звычайна знаходзяць толькі фрагмэнты керамікі, з якіх рэдка ўдаецца аднавіць цэлую форму посуду.
Падчас абсьледаваньня таксама высьветлілася, што з 21 кургану ў могільніку ва ўрочышчы Белая Гара захаваліся толькі 14 — астатнія абваліліся ў Проню.
