Яўген Каравулаў, які нядаўна прэтэндаваў на пасаду сакратара Каардынацыйнай рады, расказаў пра ціск КДБ на ягоных родных у Беларусі.
Паводле Каравулава, КДБ ужо тры месяцы тэрарызуе яго сям’ю. 25 чэрвеня яму патэлефанавалі з тэлефона бабулі. Мужчына, які назваўся Жэнем, сказаў: «Ты ж ведаеш, хто мы».
Ён распавядае, што ў ягоных родных ужо некалькі разоў праходзілі вобшукі, а аднойчы яму даслалі фота кватэры ў Менску з невядомага нумару.
Размова доўжылася каля 46 хвілінаў. Сілавікі пыталіся пра вучобу, месца жыхарства, паездкі і працу, але найбольш цікавіліся Каардынацыйнай радай.
«Калі родныя для цябе важныя, ты патэлефануеш».
Пасьля гэтага Каравулаву прапанавалі супрацоўнічаць з КДБ:
«Пад ціскам, баючыся за сям’ю, я сказаў „так“».
Затым у яго запатрабавалі код з SMS для ўваходу ў Telegram. Каравулаў коду не перадаў, заявіў, што нічога перадаваць ня будзе, і паклаў слухаўку.
Пасьля гэтага затрымалі яго маці, а ў бабулі забралі тэлефон. 28 жніўня маці затрымалі зноў — на працы. Паводле Каравулава, ёй «пажартавалі», што будуць заціскаць пальцы дзьвярыма.
Сёньня, паводле ягоных словаў, яму зноў патэлефанавалі з бабулінага тэлефону і заявілі, што заўтра зноў прыйдуць і забяруць тэлефон, каб «проста паразмаўляць».
Каравулаў раіць тым, каму тэлефануюць сілавікі, не ўступаць у размову, блякаваць нумары і адразу зьвяртацца да праваабаронцаў.
