Беларусы ў Польшчы запусцілі новую пляцоўку, дзе можна прадаваць і купляць рэчы, прапаноўваць паслугі, шукаць працу, жыльлё і кліентаў.
Па прынцыпе працы Kufar.pl — фактычна польскі аналаг беларускага Kufar, але гэта важна падкрэсліць: новы сайт не з’яўляецца філіялам беларускага Куфара, а ўяўляе сабой асобны праект.
Як распавёў стваральнік сэрвісу выданьню MOST, ідэя ўзнікла з жаданьня зрабіць пляцоўку, дзе беларусы ў Польшчы маглі б не толькі нешта прадаць ці набыць, але і знаходзіць сваіх, абменьвацца інфармацыяй ды знаёміцца. Таму на Kufar.pl ёсць нават асобны раздзел «Супольнасьць» для мерапрыемстваў, сустрэч і іншых ініцыятываў.
Аб’явы можна размяшчаць бясплатна і без рэгістрацыі. На сайце даступныя беларуская, польская, украінская і ангельская мовы.
Сэрвіс ужо напаўняецца першымі аб’явамі з розных гарадоў Польшчы.
