Прэзыдэнт Украіны Ўладзімер Зяленскі паведаміў пра падрыхтоўку новых рашэньняў у адносінах з Польшчай, у тым ліку па гістарычных пытаньнях. Паводле яго, Украіна адкрые ўсе архівы Службы бясьпекі Ўкраіны і Службы зьнешняй выведкі, якія тычацца трагічных падзеяў ХХ стагодзьдзя на Валыні.
Таксама Кіеў мае намер істотна павялічыць колькасьць дазволаў на пошукавыя і эксгумацыйныя працы. Акрамя таго, бакі абмяркоўваюць новыя фарматы пашырэньня грамадзкага дыялёгу паміж Украінай і Польшчай.
Зяленскі таксама паведаміў пра дамоўленасьць з кіраўніком Украінскага інстытуту нацыянальнай памяці Аляксандрам Алфёравым падрыхтаваць прапановы па ўмацаваньні магчымасьцяў установы, у тым ліку праз павелічэньне фінансаваньня.
У той жа дзень МЗС Украіны адрэагавала на новую пастанову Сэйму Польшчы, прысьвечаную гадавіне трагічных падзеяў на Валыні ў 1943–1944 гадах. Раней міністар абароны Польшчы Ўладыслаў Касіняк-Камыш заклікаў да прымірэньня і недапушчэньня «сьпіралі нянавісьці».
