РТБД адкрыў XXXV тэатральны сезон, але першай прэм’ерай стане не беларуская драматургія і нават не беларускамоўная пастаноўка. У сьнежні тэатар пакажа «Маленькія трагедыі» Аляксандра Пушкіна на расейскай мове.
Пастаноўку рыхтуе дырэктарка і рэжысэрка тэатру Сьвятлана Навуменка. Яна называе твор «жамчужынай драматургіі» і кажа, што зварот да яго — «сур’ёзны выклік».
Пры гэтым РТБД доўгі час быў адным з трох дзяржаўных тэатраў Беларусі, дзе спэктаклі ішлі выключна па-беларуску. Цяпер жа тэатар беларускай драматургіі зьвяртаецца да расейскай клясыкі і расейскай мовы.
У сацсетках гэта ўжо выклікала абурэньне. Гледачы пытаюцца, што застаецца ад самой ідэі Тэатру беларускай драматургіі, калі ягоная сцэна ўсё часьцей аддаляецца ад беларускай мовы і нацыянальнай драматургіі.
Асабліва паказальна, што пасьля 2020 году склад трупы істотна зьмяніўся: было звольнена каля паловы актораў і ранейшае кіраўніцтва. Цяпер жа зьмяняецца і тое, што доўгі час было галоўнай адметнасьцю РТБД — ягоная беларускамоўная сцэна.
