З пачатку 2026 году ўкраінцы ў Польшчы падалі ўжо 180 заяваў аб злачынствах, учыненых на глебе нянавісьці. Гэта больш чым на 30% перавышае леташнія тэмпы, паведамляе Rzeczpospolita са спасылкай на дадзеныя Нацыянальнай паліцыі Польшчы.
Для параўнаньня, за ўвесь 2024 год было пададзена 267 такіх заяваў, а за 2025-ы — 275. Пры гэтым гаворка ідзе пра заявы, зарэгістраваныя праваахоўнікамі, а не пра пацьверджаныя злачынствы.
Сацыёляг і кіраўнік Інстытуту грамадзкіх спраў Яцэк Кухарчык мяркуе, што рэальная колькасьць такіх выпадкаў можа быць яшчэ большай, бо частка пацярпелых не зьвяртаецца ў паліцыю праз страх.
Паводле яго, варожае стаўленьне да ўкраінцаў падсілкоўваецца рыторыкай палітыкаў і кантэнтам у інтэрнэце. Дасьледаваньне Press Club Polska і Data House Res Futura паказала, што напрыканцы траўня кожны пяты допіс у польскім сэгмэнце інтэрнэту быў крытычным у дачыненьні да Ўкраіны, а 52% усяго антыўкраінскага кантэнту прыпадала на допісы прадстаўнікоў ультраправай партыі «Канфэдэрацыя». Дасьледчыкі таксама адзначаюць, што альгарытмы сацыяльных сетак дадаткова ўзмацняюць распаўсюд такога кантэнту.
