Праваабаронцам стала вядома пра смерць у наваполацкай калоніі № 1 былога высокапастаўленага супрацоўніка КДБ Мікалая Варапая. Паводле афіцыйнай версіі, Варапая затрымалі ў 2017 годзе пры спробе перадаць украінскім спецслужбам сакрэтныя дакументы, звязаныя з вучэньнямі “Захад-2017”.
У студзені 2024 года дзяржаўнае тэлебачаньне паказала прапагандысцкі фільм пра яго справу. У ім Варапай прызнаваў віну, заяўляў, што лічыць прысуд справядлівым і не збіраецца яго абскарджваць. Пры гэтым ён казаў, што найбольш баіцца памерці ў калоніі.
Паводле інфармацыі “Вясны”, у перыяд, калі палітвязьням актыўна прапаноўвалі падпісваць прашэньні аб памілаваньні, такую магчымасьць атрымаў і Варапай. Пасля адмовы на мужчыну пачаўся ціск: супрацоўнікі КДБ нібыта рэгулярна прыязджалі да яго ў калонію, патрабуючы падпісаць адпаведныя дакументы. Паведамляецца, што пасля гэтага яго змясцілі ў штрафным ізалятар, дзе гэтыя візіты працягваліся.
Паводле інфармацыі праваабаронцаў, Варапай памёр у 2024 годзе падчас знаходжаньня ў ШІЗА. Магчымай прычынай смерці крыніцы “Вясны” называюць інсульт. Незалежнага пацверджання гэтых звестак пакуль няма. У зняволеньні Варапай меў белую бірку, якая апошнія гады выкарыстоўваецца для асуджаных па непалітычных артыкулах.
Праваабаронцы неаднаразова звярталі ўвагу, што ўмовы ўтрыманьня ў ШІЗА носяць жорсткі і бесчалавечны характар, а працяглае знаходжаньне там істотна пагаршае фізічны і псіхічны стан вязняў.
