21 чэрвеня ў касьцёле св. Аляксандра адбылася незвычайная сустрэча – урок беларускай мовы, ганаровым госьцем якога стаў Зянон Пазьняк.
Сваю прамову Пазьняк пачаў з асабістага шляху да роднай мовы, натуральна пракладзенага ў сям’і і месцы нараджэньня. Ён таксама ўзгадаў пра цяжкасьці, перашкоды і выпрабаваньні, што суправаджалі яго пазьней, ужо па-за межамі роднага асяродзьдзя.
Асаблівасьцю мерапрыемства стаў актыўны ўдзел грамады. Кожны прысутны мог напісаць на дошцы сваё любімае беларускае слова, а потым распавесьці зьвязаную зь ім гісторыю або задаць пытаньне госцю. Такі фармат стварыў жывы дыялог і атмасфєру сапраўднай супольнасьці.
Размова закранула выпрабаваньні сучаснасьці і будучыню Беларусі. Гучалі думкі пра моц і прыгажосьць роднага слова, яго здольнасьць аб’ядноўваць і натхняць.
Асобна сп. Зянон звярнуў увагу на тэму лаянкі на беларускай мове. Ён падкрэсьліў яе адметнасьць, дэлікатнасьць і прынцыповую адрознасьць ад грубасьці і брыдкасьці расейскай лаянкі.
Нагадаем, што ініцыятыва праводзіць «Урокі роднай мовы» нарадзілася нядаўна, а ўжо дэбютныя сустрэчы прайшлі з аншлагам, што сьведчыць аб вялізарным запыце на беларускае слова. Гасьцінны гаспадар імпрэзы, ксёндз Вячаслаў Барок, запрашае ўсіх на будучыя сустрэчы.
