Уначы Расея запусьціла па Ўкраіне 70 ракетаў і 611 дронаў.
Расейскі беспілотнік ударыў па Кіева-Пячэрскай Лаўры — сакральным месцы ўсяго хрысьціянства і сусьветнай культуры. Цяпер працягваецца ліквідацыя наступстваў атакі і ацэнка пашкоджаньняў.
У выніку расейскага абстрэлу таксама быў зьнішчаны цэх знакамітай кінастудыі імя Даўжэнкі, дзе дзесяцігодзьдзямі захоўвалася ўнікальная калекцыя касьцюмаў. Паводле дырэктара студыі Андрэя Дончыка, назаўсёды страчаныя каля 100 тысяч касьцюмаў, у тым ліку са знакавых фільмаў «За двума зайцамі» і «Цені забытых продкаў».
У Дняпры праз начны расейскі ўдар пацярпеў адзін чалавек. Пашкоджаны Дом арганнай і камэрнай музыкі, разбуранае адно з памяшканьняў каледжу, а выбуховай хваляй выбіла вокны ў школе.
У Кіеве колькасьць загінулых у выніку атакі ўзрасла да пяці чалавек — у шпіталі памерла жанчына, якая знаходзілася ў цяжкім стане, паведаміў мэр Віталь Клічко. Дзясяткі людзей параненыя, у тым ліку дзеці.
