Як паведамляе devby, беларусы сталі атрымліваць менш адмоваў па турыстычных і дзелавых візах у ЗША. Сьвежыя дадзеныя па грамадзянах розных краінаў апублікаваў Дзярждэпартамэнт ЗША.
За 2025 фінансавы год (з 1 кастрычніка 2024 да 30 верасьня 2025) у візе катэгорыі B было адмоўлена 26,58% заяўнікаў з грамадзянствам Беларусі. Гэта менш за 28,79% адмоваў у 2024 фінансавым годзе.
Доля адмоваў для грамадзян Польшчы, Латвіі і Літвы значна ніжэйшая — каля 12%, 19% і 21% адпаведна. Прыкладна 21% адмоваў — сярод азэрбайджанцаў.
Сярод украінцаў і расейцаў працэнт вышэйшы — 33,92% і 40,38% адпаведна.
З 21 студзеня ЗША прыпынілі выдачу іміграцыйных візаў — па працы або для ўзьяднаньня з сям’ёй — грамадзянам 75 краінаў, у тым ліку беларусам. На неіміграцыйныя візы (турыстычныя, студэнцкія і іншыя) гэтыя абмежаваньні не распаўсюджваюцца.
Між тым Пасольства Ізраілю ў Беларусі паведаміла пра пачашчэньне адмоваў ва ўезьдзе. Беларусы могуць знаходзіцца ў Ізраілі без візы да 90 дзён на працягу кожнага 180-дзённага пэрыяду, але перад паездкай неабходна загадзя аформіць дазвол праз сыстэму абавязковага папярэдняга апавяшчэньня ETA-IL. Аднак гэта не гарантуе ўезду — канчатковае рашэньне прымае памежная служба.
Адна з асноўных прычынаў адмовы — спроба выкарыстаць турыстычную паездку для пошуку працы або працаўладкаваньня. Таксама могуць адмовіць празь недакладную інфармацыю, супярэчлівыя адказы, утойваньне сапраўдных намераў або адмову супрацоўнічаць з памежнікамі. Нават наяўнасьць зваротных квіткоў і браніраваньня жытла не гарантуе ўезду. Падкрэсьліваецца, што заяўленая мэта візыту павінна адпавядаць фактычным намерам і прадстаўленым дакумэнтам, а любыя разыходжаньні могуць стаць падставай для адмовы.
