Праваабарончы цэнтар “Вясна” паведамляе, што палітзьняволеная цалкам адмовілася ад ежы у знак пратэсту супраць жудасных умоваў, якія стварыла для Паліны адміністрацыя ІЧУ Рэчыцкага РАУС.
Карнікі зьмясцілі Паліну Шарэнда-Панасюк ў камэру-адзіночку з поўнай антысанітарыяй, забралі ўсе асабістыя рэчы і прадукты. Спаць яна павінна на жалезных крывых пласьцінах «шконкі», паколькі ёй не выдалі ніякіх пасьцельных рэчаў. Яе не выводзяць на прагулкі і забаранілі ўсе віды перадачаў.
Таксама праваабаронцам стала вядома, што ў Рэчыцкім ІЧУ ў Паліны прайшлі апошнія сьледчыя дзеянні ў межах крымінальнай справы за «злоснае непадпарадкаваньне адміністрацыі калоніі». На будучым тыдні справу перададуць у пракуратуру, а затым у суд Рэчыцкага раёна.
