У дзень Беларускай вайсковай славы Рада Беларускай Народнай Рэспублікі ўзнагародзіла мэдалямі За баявыя заслугі некалькі дзясяткаў добраахвотнікаў у складзе Узброеных сілаў Украіны.
«У 1514 годзе нашыя продкі перамаглі нашмат большае маскоўскае войска, —гаворыцца ў звароце старшыні Рады БНР Івонкі Сурвіллы. — Сёньня мужнасьць выяўляеце вы, змагаючыся супраць расейскіх агрэсараў ва Ўкраіне. Менавіта ў гэтай бітве вырашаецца і лёс Беларусі, і будучыня ўсяго эўрапейскага кантынэнту».
За асабістую адвагу ўзнагароджаныя байцы Палку Каліноўскага і падразьдзяленьня «1514», усяго 75 чалавек, зь іх 12 афіцэраў адзначаныя афіцэрскімі (залатымі) мэдалямі. Дзевяць байцоў узнагароджаныя пасьмяротна.
