Служба дзяржаўнай бясьпекі (СДБ) Грузіі пачала выклікаць на допыты грузінскіх добраахвотнікаў, якія ваявалі ва Украіне супраць расейскага войска.
19 ліпеня ў Тбіліскім гарадскім судзе апыталі актывіста «Антыакупацыйнага руху» Лашу Чыгладзэ. Па дадзеных СМІ, Чыгладзэ ўдзельнічаў у баявых дзеяньнях ва Украіне ў мінулым годзе. Ён узнагароджаны медалём за мужнасьць.
Праўрадавы тэлеканал «Імеды» паведамляе, што Чыгладзэ праходзіць па справе аб змове з мэтай зьвяржэньня ўлады і «падрыхтоўкі тэрарызму». Што разумеецца пад другой часткай фармулёўкі, незразумела. Ва КК Грузіі такога артыкула няма. На справу накладзены грыф “сакрэтна”. Ні Чыгладзэ, ні ягоны адвакат не могуць казаць пра дэталі.
20 ліпеня аб выкліку на допыт паведаміў іншы сябра «Антыакупацыйнага руху», які ваяваў ва Украіне – Надім Хмаладзэ, паведамляе агенцтва «Навіны-Грузія». Ці зьвязана гэта са справай, у якой фігуруе Чыгладзэ, пакуль невядома.
У верасьні 2023 года СДБ паведаміла аб раскрыцьці арганізаванай за мяжой змовы з мэтай захопу ўлады ў Грузіі. Аўтарамі называліся лідэры апазіцыйнага “Нацруху”, сябры дзеючага ва Украіне “Грузінскага легіёна” і прадстаўнікі грамадзянскага сэктара, якія фінансуюцца ЗША. План, як сьцвярджалася, складаўся ў тым, каб зладзіць у Грузіі рэвалюцыю па прыкладзе ўкраінскага «эўрамайдана».
