9 сакавіка 2024 года жаўнеры палка Кастуся Каліноўскага сьвяткуюць другую гадавіну стварэньня вайсковай часткі.
Беларускія добраахвотнікі з першых дзён Вялікай вайны змагаліся з маскоўскай навалай: абаранялі Кіеў, змагаліся за вызваленьне Мікалаеўскай вобласьці, Херсоншчыны, Харкаўскай вобласьці, абаранялі Севераданецк, Лісічанск, Бахмут.
У шэрагах Збройных Сіл Украіны беларусы самаахвярна змагаюцца ў вырашальны час для двух народаў і будучыні ўсёй Эўропы. За годнасць і свабоду Украіны і Беларусі загінулі ваяры: Волат, Тэрор, Брэст, Сябро, Атама, Літвіна і дзесяткі іншых мужных жаўнераў, якія вярнуліся з бою на шчыце.
Сёньня Полк імя Каліноўскага – вайсковая структура з каласальным баявым досьведам і разьвітой арганізацыйнай структурай. Гэта развітая інфраструктура, якая ўключае ў сябе ўласны рэкруцінгавы цэнтр, валанцёрскую сетку, навучальныя цэнтры, дзе праводзіцца падрыхтоўка добраахвотнікаў, прэс-цэнтр, станцыю тэхнічнага абслугоўваньня аўто, уласную лагістыку.
У баявую частку Полка ўваходзяць батальён «Волат», батальён «Літвін», БПЛА імя Мікіты Крыўцова, медычная рота, механізаванае падраздзяленьне. З 2023 года сфармавана новае падраздзяленьне імя Касцюшкі. Яно складаецца з замежных грамадзянаў, у асноўным жыхароў Эўрапейскага зьвязу і ЗША, якія прайшлі службу ў прафесійных узброеных сілах і маюць вялікі вайсковы досьвед. І гэты досьвед Полк імкнецца пераняць і перадаць яго беларускім ваярам.
У дзень другой гадавіны ўтварэньня Батальёну (пазьней Полку) ім.Кастуся Каліноўскага гучаць словы віншаваньняў і падзякі ад беларускіх палітыкаў і грамадзян, а таксама ад ГУР Украіны і украінцаў.
