Закрыць пункты пропуску “Лаварышкес” – “Катлоўка” і “Райгардас” – “Прывалка” прапануе камісія па нацыянальнай бясьпецы Літвы, паведамляе LRT.
У камісіі таксама прапанавалі абмежаваць пасадку і высадку пасажыраў у чыгуначным пункце пропуску “Кена” і зьменшыць колькасьць дазволаў для кіроўцаў на аўтобусныя перавозкі.
“За апошні час паток беларускіх грамадзян павялічыўся прыкладна на 50 працэнтаў. Неабходна аптымізацыя працэсу кіраваньня гэтымі патокамі, канцэнтрацыя тых сродкаў і больш дэталёвы надгляд”, гаворыцца ў дакладзе кіраўніка Нацыянальнага цэнтра крызіснага ўпраўленьня Вілмантаса Віткаўскаса. Закрыць яшчэ два пункты пропуску ён прапануе для “павышэньня эфектыўнасьці кантролю на мяжы”.
Заўважым, што з 18 жніўня 2023 года Летува закрыла пагранпераходы “Шумскас – Лоша” і “Цвярачус – Відзы”. Калі зачыняць яшчэ два, то застануцца толькі “Каменны Лог – Медынінкай” і “Беняконі – Шальчынінкай”.
