22 лістапада 2019 года ў Вільні адбылося (пера)пахаванне паўстанцаў 1863-64 гадоў, у тым ліку Зыгмунта Серакоўскага і Вінцэнта “Кастуся” Каліноўскага.
Прах удзельнікаў паўстаньня пасьля працэсіі праз цэнтар Вільні быў пахаваны ў капліцы на могілках Росы.
У той дзень у Вільню прыехалі тысячы беларусаў з нацыянальнымі сьцягамі, каб на ўласныя вочы паглядзець на гістарычную падзею.
Парэшткі паўстанцаў былі выяўлены выпадкова падчас раскопак у 2017 годзе на гары Гэдыміна ў Вільні літоўскімі архэолагамі.
У сакавіку 2019 года літоўскія дасьледчыкі пацьвердзілі ідэнтыфікацыю рэшткаў Каліноўскага.
Дзяржаўную камісію ў справе перапахавання ўзначаліў прэм’ер-міністар Літвы Саўлюс Сквярняліс. Польскія ўлады актыўна супрацоўнічалі ў перамовах пра мемарыялізацыю, а беларускі урад асаблівай зацікаўленасьці не праявіў. Беларуская грамадскасьць дамаглася таго, каб на кожным надмагіллі апроч надпісаў па-літоўску і па-польску была і беларуская мова.
