Пасьля сыходу замежных брэндаў абутку з рынку Расеі, заўважна павялічылася лічба продажу валёнак.
У трэцім квартале 2023 года іх продаж вырас на 373%, паведаміла прэс-служба дзяржаўнай сістэмы маркіроўкі “Сумленны знак”.
Вытворчасьць валёнак у трэцім квартале павялічылася на 20%: з 249 тыс. да 302 тыс. пар, а ў параўнаньні з другім кварталам 2023-га – на 62%.
Асабліва тавар стаў больш запатрабаваны на анлайн-платформах — тут продажы павялічыліся на 43%.
Больш за ўсё валёнак выпускаюць прадпрыемствы Яраслаўскай і Ніжагародскай абласьцей, тройку лідэраў замыкае Татарстан.
Дарэчы, высокі попыт не прывёў да росту коштаў. Валёнкі нават крыху патаньнелі — зь 1369 рублёў у другім квартале да 1332 рублёў у трэцім.
Нагадаем, што пасьля лютага 2022 года сотні замежных брэндаў закрылі свае расейскія магазіны ў адказ на ўварваньне ва Украіну. Сярод вытворцаў абутку, адзеньня і аксесуараў гэта зрабілі Adidas, Nike, Reebok, Decathlon, Puma, Levi’s, H & M, Zara, Pull & Bear, Bershka, Massimo Dutti, Chanel, Louis Vuitton, Balenciaga і іншыя.
