Аб гэтым паведаміў Беларускі Дабраахвотніцкі Корпус:
9 траўня на Ліманскім кірунку, выконваючы баявую задачу ў складзе 60-й АМБр 3-га АК, склаў галаву Ціхан «Франц» Клюкач. Маруднасьць эвакуацыі і працэдураў апазнаньня на чатыры месяцы адцягнулі разьвітаньне з нашым пабрацімам.
13 верасьня пабрацімы з 60-й Інгулецкай брыгады запрасілі нас на апошняе разьвітаньне з Францам.
Ціхан — герой і сьветлы воін украінскай і беларускай нацыяў. Таму пад скляпеньнямі разьвітаньня гучалі «Малітва ўкраінскага нацыяналіста» і «Зарок беларускага ваяра», гімн Украіны і сьвятая «Пагоня».
Пачэсная варта аддала належнае Герою трайным залпам. Прадстаўніцы, якую загадзя вызначыў Ціхан, былі перададзеныя нацыянальныя сьцягі Беларусі і Ўкраіны, а таксама штандар 60-й АМБр.
Ціхан «Франц» Клюкач адышоў у полымя, як таго і жадаў сваёй уласнай воляй. Мы годна правялі ў маўклівую вечнасьць нашага шляхетнага брата.
Усе словы, якія мы не пасьпелі яму сказаць, скажам пры сустрэчы — там, за мяжой быцьця. А тут, у гэтым сьвеце, адзіным нашым словам будзе бязьлітасная помста ў баі.
