Польскае выданьне Onet апублікавала вялікі матэрыял пра тое, як беларускія ўлады зьмяняюць выкладаньне гісторыі ў школах і ўсё больш набліжаюць яго да расейскай гістарычнай наратывы.
Аўтар матэрыялу Ян Кшыштаф Міхалак піша, што гісторыя ў Беларусі ўсё менш становіцца вывучэньнем мінулага і ўсё больш — інструмэнтам палітычнага выхаваньня.
Паводле новых рэкамэндацыяў Міністэрства адукацыі, «ацэнка гістарычных падзеяў і гістарычных асобаў павінна адпавядаць прынцыпам гістарычнай палітыкі Рэспублікі Беларусь».
У матэрыяле Onet прыводзяцца канкрэтныя прыклады.
Кастусь Каліноўскі ў новых рэкамэндацыях ужо характарызуецца як «змагар за польскія інтарэсы», а «Мужыцкая праўда» нібыта мела на мэце ўцягнуць беларускіх сялянаў у барацьбу «за інтарэсы Польшчы».
Тадэвуш Касьцюшка падаецца проста як «патрыёт Польшчы», а ягонай мэтай называецца аднаўленьне Рэчы Паспалітай у межах 1772 году.
Пры гэтым пэрыяд знаходжаньня беларускіх земляў у Расейскай імпэрыі прапануюць паказваць як час, які нібыта спрыяў фармаваньню беларускай нацыянальнай дзяржаўнасьці і «дазволіў спыніць паланізацыю беларусаў».
Асобна Onet зьвяртае ўвагу на сучасную гісторыю. У новым падручніку разьдзел «Прэзыдэнцкая рэспубліка — гістарычны выбар беларускага народу» прысьвечаны фактычна апалягетыцы Аляксандра Лукашэнкі. Падзеі 2020 году называюцца «спробай дзяржаўнага перавароту і ўмяшаньнем Захаду», а мірныя пратэсты — «каляровай рэвалюцыяй», інсьпіраванай ЗША і ЭЗ.
Вайна Расеі супраць Украіны ў падручніках фігуруе як «СВА», а расейская і крамлёўская вэрсія яе прычынаў падаецца без крытычнага аналізу. Расея і Ўладзімер Пуцін апісваюцца станоўча, а Захад і Ўкраіна — як крыніцы дэстабілізацыі.
Беларускую школьную гісторыю ўсё больш выкарыстоўваюць як інструмэнт расейскай ідэалёгіі і прапаганды.`
