Беларускім добраахвотнікам, якія ваююць за Ўкраіну, пагражае звальненьне з украінскага войска, калі яны ня змогуць прайсьці працэдуру легалізацыі да 10 лістапада.
Праблема ў тым, што для легалізацыі замежны вайсковец мусіць прад’явіць арыгінал дакумэнта, які пацьвярджае асобу. А частка беларусаў страціла пашпарты падчас службы. Аднавіць іх ва Ўкраіне немагчыма, а вяртаньне ў Беларусь можа азначаць крымінальны перасьлед.
Паводле намесьніцы прадстаўніцы Аб’яднанага Пераходнага Кабінэту Анастасіі Махамет, ёй вядома як мінімум пра восем такіх выпадкаў:
«Чалавек, у якога фізічна няма пашпарта, не можа ўвайсьці ні ў якую працэдуру».
Паводле яе, некаторыя вайсковыя часткі ўжо неафіцыйна папярэджваюць: калі праблему ня вырашыць, людзей без пашпартоў могуць звольніць.
Махамет прапануе прызнаць ваенны білет дакумэнтам, які дазваляе пацьвердзіць асобу і статус добраахвотніка.
Праблемы ня толькі з дакумэнтамі. Ёсьць складанасьці з легалізацыяй пасьля звальненьня, выплатамі сем’ям загінулых, а таксама статусам сем’яў зьніклых безь вестак і ваеннапалонных.
У выніку беларусы, якія рызыкуюць жыцьцём, абараняючы Ўкраіну ад расейскай агрэсіі, могуць апынуцца без дакумэнтаў, прававога статусу і гарантыяў, неабходных для далейшай службы.
