У Летуве “няма арганізаваных груп, якія прапагандуюць ідэалогію літвінізму”, якія маглі б “уяўляць пагрозу незалежнасьці, канстытуцыйнаму ладу і тэрытарыяльнай цэласнасьці краіны”, заяўляе Дэпартамент дзяржаўнай бяспекі (ДДБ) Летувы.
З адпаведнай заявай ДДБ выступіў у сувязі з “павелічэньнем у апошнія тыдні колькасьці электронных лістоў, якія рассылаюцца летувіцкім палітыкам і грамадскім дзеячам, з пагрозамі ад груп, якія нібыта прапагандуюць ідэалогію літвінізму”.
Спецслужба таксама адрэагавала на спробы ў сацсетках “завербаваць летувісаў для напісання лозунгаў гэтай ідэалогіі ў грамадскіх месцах за грашовую ўзнагароду”.
На думку ДДБ, “такая дзейнасьць адпавядае асаблівасцям псіха-інфармацыйных аперацый, арганізаваных варожымі Летуве дзяржавамі і накіраваных на стварэньне панікі ў грамадстве краіны”.
“Пад выглядам літвінізму таксама робяцца спробы дыскрэдытаваць дэмакратычную апазіцыю ў Беларусі і выклікаць варожасьць грамадзян Летувы з беларусамі, якія жывуць у краіне”, — зьвярнула ўвагу ведамства. Адзначана, што ў дэпартаменце “адсочваюць працэсы, якія адбываюцца ў новай беларускай дыяспары ў Літве, з мэтай выяўлення і прадухіленьня рызык і пагроз нацбясьпецы”.
Нагадаем, што з 2023 года ўлада Летувы “праводзіць розныя мэтавыя мерапрыемствы па кантролі над грамадзянамі гэтых краін у сувязі з узрослай пагрозай, якую рэжымы Расеі і Беларусі працягвалі прадстаўляць для Летувы “. 7 сакавіка у штогадовым дакладзе ДДБ і Другога дэпартамента аператыўных службаў (ВДОС) Міністэрства абароны сярод іншага гаворыцца аб перасьледзе беларускімі спецслужбамі супрацоўнікаў дыпламатычнай місіі Летувы і аб тым, што рэжым Аляксандра Лукашэнка пашырыў разведвальныя аперацыі за мяжой і ўзмацніў унутраную контрвыведку.
Сьцвярджаецца, што беларускія разьведвальныя службы “нядаўна пачалі ўстанаўліваць і аднаўляць кантакты з членамі беларускай дыяспары [у Летуве] і вербаваць новых агентаў, выкарыстоўваючы сучасныя метады аддаленай сувязі”.
