Былы сябра партыі “Грамада” Ігар Леднік памёр у зьняволеньні на 64-м годзе жыцьця.
Ігар Леднік быў затрыманы 12 красавіка 2022 г. і асуджаны на тры гады зьняволення па арт.367 (паклёп на Лукашэнку) за публікацыю ў партыйным часопісе БСДП “Пазіцыя”. Нягледзячы на інваліднасьць, яго прыгаварылі да трох гадоў калоніі. У зьняволеньні здароўе актывіста пагоршылася. У ліпені 2022 года яму зрабілі аперацыю на страўнікава-кішачным тракце.
3 гады калоніі Ігару Ледніку прызначыла “судзьдзя” Таццяна Шоцік, вядомая сваімі палітычна матываванымі прысудамі. Яна ўзначальвала працэсы па справе футбаліста Васіля Хамутоўскага, музыкі Аляксандра Кухарэнкі, экс-адваката Андрэя Мачалава, перакладчыцы Вольгі Калацкай. Таксама яна асудзіла мінчука да трох месяцаў арышту за надпіс «НЕТ ВОЙНЕ» на плоце.
Ігар Леднік актыўна выступаў за ліквідацыю Саюзнай дзяржавы Беларусі і Расеі і лічыў, што Будапешцкі мэмарандум быў парушаны ў Беларусі пасля разгону Вярхоўнага Савета ХІІІ скліканьня, што прывяло да ўсталяваньня ў Беларусі дыктатуры, збліжэньня яе з Расеяй і падрыву бясьпекі ў эўрапейскім рэгіёне.
На гэты момант мы ведаем пра яшчэ мінімум чатырох беларусаў, забітых у лукашысцкіх вязьніцах: Вітольд Ашурак, Мікалай Клімовіч, Алесь Пушкін, Вадзім Храсько.
