Беларусы, якія жывуць ва Ўкраіне і ня маюць дзейнага пашпарту, могуць ужо пасьля 4 жніўня страціць законны статус. Паводле новых правілаў, замежнікі павінны да гэтай даты падаць дакумэнты на падаўжэньне часовага дазволу на жыхарства (ДНЖ), аднак без дзейнага пашпарту зрабіць гэта немагчыма.
Праблема ўзьнікла пасьля таго, як урад Украіны скасаваў ранейшы парадак, які дазваляў замежнікам з пратэрмінаванымі дакумэнтамі легальна знаходзіцца ў краіне да заканчэньня ваеннага становішча. Цяпер беларусы, якія ня могуць вярнуцца на радзіму для абмену пашпарту праз пагрозу перасьледу, апынуліся ў прававой пастцы.
Паводле прадстаўнікоў беларускай супольнасьці ва Ўкраіне, пасьля 4 жніўня такія людзі могуць стаць нелегаламі, атрымаць штрафы і нават тэарэтычна сутыкнуцца з дэпартацыяй у Беларусь. Юрысты ўжо падрыхтавалі законапраект, які павінен вырашыць праблему, аднак часу на яго прыняцьце практычна не засталося.
Паводле стану на канец лютага 2026 году, ва Ўкраіне налічвалася 2958 грамадзян Беларусі з часовым дазволам на жыхарства.
