Пра гэта паведамілі прэм’ер-міністар Польшчы Дональд Туск і праваахоўныя органы.
«Падазраваны ў забойстве расейца ў Бялай-Падлясцы затрыманы паліцыяй Любліну і Агенцтвам унутранай бясьпекі. Ён карыстаецца грузінскім пашпартам. Вядзецца праца па ўстанаўленьні асобы арганізатара злачынства», — напісаў Туск.
У паліцыі дадалі, што затрыманы карыстаўся пашпартам, выдадзеным на імя 36-гадовага грамадзяніна Грузіі.
Паводле выданьняў Onet і RMF FM, затрыманы — чачэнец, а ягоныя дакумэнты, імаверна, падробленыя.
Раней былі затрыманыя двое беларусаў, аднак пазьней высьветлілася, што яны ня маюць дачыненьня да справы.
Карыкатурыст Сямён Скрэпецкі быў забіты 15 чэрвеня ў горадзе Бяла-Падляска каля беларускай мяжы. За тыдзень да сьмерці ён правёў пэрформанс каля Брандэнбурскай брамы ў Бэрліне, пасьля якога пачаў атрымліваць пагрозы.
13 чэрвеня Скрэпецкі таксама апублікаваў карыкатуру на Адама і Рамзана Кадыравых пасьля навіны пра прысваеньне Адаму Кадыраву званьня «Герой Чачні».
